Şəki, Oğuz və Qəbələ rayonlarında Kənd Təsərrüfatı Nazirliyinin nümayəndələri fermerlərlə görüşlər keçirib. Bu barədə 7 dekabr tarixində Nazirliyin rəsmi səhifəsində məlumat verilib.
Görüşlərin məqsədi əkinlərin bəyan prosesinin sürətləndirilməsidir. Fermerlərə payızlıq əkinlərin Elektron Kənd Təsərrüfatı İnformasiya Sistemində bəyanı prosesinin dekabrın 30-da başa çatması barədə məlumat verilib.
Tədbirdə çıxış edən Nazirliyin Aparat rəhbəri Rəfail Quliyevin sözlərinə görə, ölkənin əsas taxılçılıq rayonlarından olan Şəkidə, eləcə də əkin dövriyyəsində payızlıq əkinlərin payı böyük olan Oğuz və Qəbələ rayonlarında səpin prosesi yekunlaşmaq üzrədir. Ötən il bu üç rayonda ümumilikdə 100 min hektardan çox taxıl əkilib və biçin dövründə sahələrdən bol məhsul götürülüb.
Aqrar Subsidiya Şurasının qərarına görə, 2022-ci ildə arpa və buğda sahəsinin hər hektarına görə 210 manat əkin subsidiyası veriləcək ki, bu da fermerin əkinə çəkdiyi istehsal xərclərinin önəmli hissəsini qarşılayır. Səpini başa çatdırmış fermerlər subsidiya almaq üçün öz əkinlərini Elektron Kənd Təsərrüfatı İnformasiya Sistemində bəyan etməli, 5 hektardan artıq sahəsi olan fermerlər torpağın aqrokimyəvi analizinin nəticələrini şəxsi kabinetə yükləməli, 10 hektardan artıq sahəsi olan fermerlər isə əlavə olaraq sahələrini sığortalamalıdır. Sığorta xərclərinin tam yarısı dövlət tərəfindən ödənilir.
