Azərbaycan bir müddətdir ki, İtaliya ilə iriçaplı silahların alınması ilə bağlı danışıqlar aparır.
Bu barədə 21 sentyabr tarixində APA xarici KİV-lərinə istinadən xəbər verib.
Bakının siyahısına təlim təyyarələri, avtomatlar, özüyeriyən zenit silahları, yer-hava tipli raket batareyaları, nəqliyyat təyyarələri və mini sualtı qayıqlar daxildir.
Sövdələşmənin 1-2 milyard avro dəyərində olduğu təxmin edilir. Artıq bir neçə aydır ki, iki ölkənin Müdafiə nazirlikləri arasında “Azərbaycan Silahlı Qüvvələrinin modernləşdirilməsi planına İtaliyanın töhfəsi”ni müzakirə edən “texniki masa” yaradılıb. Danışıqlar İtaliya Müdafiə Nazirliyinin ofisində keçirilir.
Məqalədə xatırladılır ki, iyun ayında İtaliyanın təhlükəsizlik və müdafiə sənayesi şirkəti "Leonardo" taktiki nəqliyyat təyyarəsinin ən təkmil versiyası olan iki turbinli “C27J Spartan”ın Azərbaycana satışını elan edib:
“Əslində bütün müqavilələr hələ də hərbi ixraca nəzarət edən qurum (UAMA) tərəfindən bloklanır. UAMA-nın qaydalarına görə, hərbi ləvazimatların müharibə şəraitində olan ölkəyə verilməsi mümkün deyil və Azərbaycan da 30 ilə yaxındır Dağlıq Qarabağ münaqişəsində tərəfdir. Təbii ki, həmin bölgədə sualtı qayıqlardan istifadə olunacağını güman etmək olmaz. Bu, ixrac sorğusunda vurğulanan bir cəhətdir, amma qanunun meyarları ciddidir və hətta mini sualtı qayıqlar Azərbaycan qüvvələrinin ümumi gücünü artıracaq”.
“La Repubblica” yazır ki, mini sualtı qayıqlar Bakının ən çox əldə etmək istədiyi hərbi texnikadır. Lakin İtaliya ilə uzun müddətli görüşlər nəticə göstərmədiyindən Azərbaycan Türkiyə və İsraildə alternativ istehsalçılar axtarmağa başlayıb.
