Sabah, mayın 8-də Şəmkirdə KOB Fest sərgi-satış yarmarkası keçiriləcək. Tədbir Heydər Əliyev Mərkəzinin qarşısında, saat 10:00-20:00-da baş tutacaq. Bu haqda Kiçik və Orta Biznesin İnkişafı Agentliyindən (KOBİA) məlumat verilib.
Yarmarkada qida və qeyri-qida məhsulları, sənətkarların və yaradıcı şəxslərin əl işləri, eləcə də KOB-lar tərəfindən göstərilən xidmətlər təqdim ediləcək. Həmçinin “B2B” görüşlərin keçirilməsi, mədəni-əyləncəli proqramın və sənətkarlar tərəfindən master-klassların təşkili nəzərdə tutulub.
“KOB Fest”in keçirilməsində məqsəd mikro və kiçik sahibkarlıq subyektlərinin istehsal etdiyi məhsul və xidmətlərin geniş istehlakçı auditoriyasına təqdim etmək və satışına dəstək olmaqdır.
Daha öncə, aprelin 25-də yarmarka İcərişəhərdə təşkil olunmuşdu. Tədbirin Gəncə, Lənkəran, Füzuli, Quba və Sumqayıtda da keçirilməsi planlaşdırılır.
