“Məqsədim Azərbaycanı beynəlxalq arenada tanıtmaqdır”.
Bu sözləri media.az-a müsahibəsi zamanı Londonda yaşayan bloqer Ayfra Manto deyib.
Azərbaycan və Konqo irsinin vəhdətində böyüyən həmvətənimiz Ayfra Manto gənc yaşlarında Londona köçüb. O, məşhur bloqu vasitəsilə Azərbaycanın mədəniyyətini, adət-ənənələrini dünya auditoriyasına tanıdır.
“Valideynlərim Azərbaycan Memarlıq və İnşaat Universitetində tanış olublar. Atam – texnika elmləri doktoru Fransis Manto müəllim, anam Aygün isə tələbə olub. Anam imtahandan kəsildikdən sonra onların münasibəti başlayıb və sevgiyə çevrilib (gülümsəyir). İlk vaxtlar nənəmlə babam fərqli mədəniyyətdən olan bir insanla ailə qurmağa tərəddüdlə yanaşsalar da, atamın Azərbaycan adətlərinə hörməti, anama milli qaydalara uyğun elçilik etməsi onların ürəyincə oldu. İndi isə atama doğma oğulları kimi yanaşırlar”.
Ayfra xarici vətəndaş kimi Britaniyada iş tapmağın çətin olduğunu qeyd edib:
“Burada yerli namizədlərlə rəqabət aparmaq asan deyil. Amma güclü portfolio və təcrübə bu yolda əsas amillərdir. Əgər insan çalışırsa, qarşısına məqsəd qoyursa – hər şey mümkündür”.
Həmvətənimiz “Instagram” bloqunda Azərbaycanı tanıtmaq istədiyini də vurğulayıb:
“Kanalımı azərbaycanca, rusca və ingiliscə aparıram. Məsələn, Xocalı faciəsi və Novruz bayramı haqqında videolar paylaşmışam. Yeni rubrikam “This is Azerbaijan” çərçivəsində isə mətbəximizi, musiqimizi və sevdiyim yerləri təqdim edirəm. Bakı mənim üçün çox dəyərlidir. Hər səfərimdə mütləq “İçərişəhərdə” gəzintiyə çıxıram. Həmçinin Qəbələ, Qax və İsmayıllı bölgələrinə səfərlər etməyi çox sevirəm. Oradakı təbiət və ənənəvi çay süfrəsi Londonda ən çox darıxdığım şeylərdəndir”.
[gallery link="file" size="full" columns="2" ids="221808,221809,221810,221811"]
