Bu gün, iyunun 13-də İmişli rayonunun sabiq icra başçısı Vilyam Hacıyevin cinayət işi üzrə məhkəmə iclasında ekspertiza rəyləri üzrə aktlar elan olunub. Bu barədə Report məlumat paylaşıb.
Müəyyən edilib ki, V.Hacıyevin rəhbərliyi dövründə üzrsüz səbəblərdən işə çıxmayan 356 vətəndaşın adı Dost İş mərkəzinə işlə təmin edilən şəxs qismində qeyd edilib və adlarına əmək haqqı yazılıb. Sözügedən vətəndaşların adına 481 min manat maaş yazılıb, lakin bu məbləğ həmin şəxslərə verilməyib.
Bununla yanaşı, işıq dirəklərinin alınması və təmirinə 162 min manat, Dövlət Arxivində kitabların saxlanılmasına 75 min manat, çoxmənzilli binaların təmirinə 1 milyon manat vəsait köçürülüb. Həmçinin İmişli rayon Mərkəzi Xəstəxanasının təmirinə 23 701 manat, Yaşıllaşdırma İdarəsinin təmirinə 559 min manat, İmişli Turizm Şöbəsinin təmirinə isə 118 min manat ayrılıb. Lakin həmin məbləğlər təyinatı üzrə xərclənməyib.
Sabiq icra başçısının vəkili məbləğlərin seçmə üsulu ilə aparıldığını vurğulayıb. "Biz maliyyə eksperti tələb edirdik ki, bu rəqəmlərə aydınlıq gətirsin. Aktda göstərilib ki, 4 milyon 879 min manat İmişli Rayon İcra Hakimiyyətinin inzibati binasının tikintisinə ayrılıb. Amma bu məbləğin nə qədəri mənimsənilib, nə qədəri xərclənib, o rəqəm dəqiq göstərilməyib", - deyə vəkil söyləyib.
Məhkəmənin növbəti iclası iyunun 17-də baş tutacaq.
Vilyam Hacıyev 2020-ci il mayın 5-də Dövlət Təhlükəsizliyi Xidməti tərəfindən saxlanılıb, daha sonra da həbs edilib. O, “vəzifə səlahiyyətlərindən sui-istifadə”, “rüşvət alma”, “mənimsəmə” və “vəzifə saxtakarlığı” maddələrilə ittiham olunur. V.Hacıyev vəzifə cinayətləri ilə yanaşı, qanunsuz silah saxlamaqda da təqsirli bilinib.
