Prezident Administrasiyasının sabiq şöbə müdiri Əli Həsənovun bacanağı Ədalət Vəliyevə məxsus 36 milyon manatlıq əmlak müsadirə edilib. Bu barədə dekabrın 28-də Report məlumat verib.
Bakı Ağır Cinayətlər Məhkəməsinin hökmünə əsasən, Ədalət Vəliyevin paytaxtın Yasamal rayonunda yerləşən ümumi sahəsi 12 535,9 kvadratmetr olan əmlakı müsadirə edilib. Yasamal rayonunun Mətbuat prospekti, 23 ünvanında yerləşən əmlakın dəyəri 36 milyon manat təşkil edir.
Həmçinin məhkəmənin hökmü ilə Ədalət Vəliyevə şərti cəza verilib və prokurorluğun depozit hesabına qoyulmuş 1 milyon manat pul vəsaiti müsadirə olunub.
Sözügedən əmlak Ə. Həsənovun oğlu Şamxal Həsənovun adına olub, istintaq dövründə isə Ə. Vəliyevə bağışlanılıb. Əmlakın üzərinə həbs qoyulub, daha sonra isə onun müsadirə edilməsi haqqında hökm oxunub.
