Masallı Rayon Mərkəzi Xəstəxanasında ölü dölün doğulması faktı ilə bağlı araşdırma aparılır. Bu barədə Baş Prokurorluq məlumat verib.
Məlumata görə, iyulun 16-da 2007-ci il təvəllüdlü Masallı rayon sakini Səfurə Qubadovanın 40 həftəlik dölün baş gəlişi, doğuşun 1-ci dövrü, ölü döl diaqnozu ilə Masallı Rayon Mərkəzi Xəstəxanasına daxil olması faktı ilə bağlı Masallı Rayon Prokurorluğunda araşdırma aparılır.
Qeyd edək ki, iyulun 15-də Masallı rayonunun 2007-ci il təvəllüdlü Təklə kənd sakini Qubadova Səfurə Elvin qızı 40 həftəlik dölün ( USM-ə görə 36 həftəyə uyğun) bətndaxili ləngiməsi, dölyanı mayenin azlığı diaqnozu ilə Masallı Rayon Mərkəzi Xəstəxanasının Doğuş və ginekologiya şöbəsinə daxil olub.
Müayinə olunduqdan sonra daha ixtisaslı tibbi yardım üçün təcili tibbi yardımla saat 15:45-də Lənkəran Regional Perinetal Mərkəzə göndərilib.
Pasiyent qeyd olunan xəstəxanada yatmaqdan imtina edib, iyulun 16-da saat 04.00-da 40 həftəlik (USM-ə görə 36) baş gəlişi, doğuşun 1-ci dövrü, ölü döl diaqnozu ilə yenidən Masallı Rayon Mərkəzi Xəstəxanasına daxil olub.
Saat 05:30-da cinsi qız, çəkisi 2.8 kq, boyu 49 sm çəkidə ölü uşaq doğulub.
Yaxınları bildirirlər ki, uşağın ölümünə səbəb həkim səhlənkarlığıdır.
