Baş Mil-Muğan Kollektoru bu günə qədər 262 min hektar şoran torpaqları təmizləyib. Bu barədə iyunun 20-də “Azərbaycan Meliorasiya və Su Təsərrüfatı” ASC məlumat yayıb.
Artıq kollektorun sağ və sol sahilində yerləşən torpaqlar münbit bir torpağa çevrilib. Bu torpaqlarda əkin işləri aparılır və pambıq, taxıl, yonca kimi kənd təsərrüfatı bitkiləri əkilir.
Kollektor daşqınlar və subasmalar zamanı artıq suları Xəzər dənizinə axıdır. Hər il dənizə 1 milyard 300 milyon kubmetr su axıdılır.
Qeyd edək ki, Baş Mil-Muğan Kollektoru 1994-cü ildə yaradılıb və Salyan, Sabirabad, Neftçala və Saatlı rayonlarına xidmət edir. Kollektorun ümumi uzunluğu 141 kilometrdir.
