Mingəçevirdə məktəbli Orxan Kərimovu güllələyərək qətlə yetirən 1983-cü il təvəllüdlü Əlvan Qasımova hökm oxunub. Bu haqda oktyabrın 19-da Qafqazinfo xəbər yayıb.
Hökmə əsasən, o, 13 il müddətinə azadlıqdan məhrum edilib. Məhkəmə zamanı Ə.Qasımov ifadəsində məktəblini hansı səbəbdən öldürdüyünü açıqlayıb.
Hadisə ötən ilin noyabrın 18-də Mingəçevir şəhərinin “Yeni Həyat” yaşayış massivində baş verib. O bildirib ki, O.Kərimov dayısı oğlu M.İsmayılovla birgə onun oğluna qarşı seksual xarakterli zorakılıq hərəkətləri edib.
Əlvan qətlin baş verdiyi gün qonşuluqda şəhidin yas mərasiminə yollanıb və Orxanı da orada görüb. O, yas qurtardıqdan sonra axşam saatlarında evə gəlib və gizlətdiyi tapançanı özü ilə götürüb.
Daha sonra Əlvan Orxanın həmyaşıdlıları ilə birlikdə çayxanadan çıxıb ev tərəfə getdiyinə şahidlik edib. Orxangilin yanından keçərkən Orxan və yanındakı həmyaşıdları uca səslə gülməyə başlayıblar. Əlvan həmin şəxslərdən uzaqlaşsa da, artıq səbri çatmayıb və yığılmış kütləyə tərəf geri qayıdıb. O, iç cibindən “Makarov” tipli tapançanı çıxararaq Orxana güllə qurtarana qədər atəş açıb. Silahda güllə qurtardığından atəşi dayandırıb, daha sonra tapançanı əlində saxlayaraq evə gedib.
Sonra Əlcan evə gedib və oğluna Orxanı öldürdüyünü deyib və ailəsi ilə vidalaşıb. Bir neçə dəqiqə sonra isə onun evinə gələn polis əməkdaşlarına təslim olub.
