Bakının Nərimanov rayonunda küçədə gecələyən qadın dövlət sığınacağına yerləşdirilib. Bu barədə dekabrın 10-da “Təmiz Dünya” Qadınlara Yardım İctimai Birliyinin sədri Mehriban Zeynalova Facebook-da paylaşım edib.
Daha öncə, dekabrın 7-də sosial şəbəkələrdə əlilliyi olan yaşlı qadının Nərimanov rayonu ərazisində olan evlərdən birinin qarşısında qoyulduğu barədə məlumatlar yayılıb. Bununla bağlı Baku TV məsələni araşdırıb.
Məlum olub ki, qadın oğlu və gəlini ilə yola getmədiyindən Ramana qəsəbəsi, Şuşa şəhərciyində yerləşən evindən çıxıb. Hadisə yerinə gələn polis əməkdaşı bildirib ki, qadın bir neçə gün öncə sığınacağa yerləşdirilsə də, oradan ayrılaraq yenidən küçələrdə qalmağa davam edib.
