Azərbaycan Beynəlxalq Ədalət Məhkəməsinin qərarının elan edilməsindən 3 gün öncə Ermənistan tərəfindən mina xəritələrinin verilməsinə nail olub. Bunu dekabrın 8-də xarici işlər nazirinin müavini Elnur Məmmədov mətbuat brifinqində deyib.
Nazir müavini bildirib ki, Ermənistan bu məsələdə qeyri-səmimi mövqedən çıxış edib: “Bu ilin iyun-iyul aylarında Ermənistan xüsusi şərt irəli sürərək mina xəritələrini verəcəyini deyib və Azərbaycanda saxlanılan cinayət törətmiş ermənilərin qeyd-şərtsiz Ermənistana qaytarılmasını bildirib. Halbuki beynəlxalq konvensiyaya görə, Ermənistan heç bir şərt irəli sürmədən minalanmış ərazilərin xəritələrini Azərbaycana verməlidir”.
Nazirin sözlərinə görə, Ermənistan Bakı şəhərində açılmış Hərbi Qənimətlər Parkının erməni millətinə qarşı etnik nifrətin təzahürü olduğunu bildirmişdir. “Məhkəmədə parkın mahiyyəti və məqsədi ətraflı izah edilib. Nəticədə məhkəmə Ermənistanın vəsatətini rədd edib”, - deyə Elnur Məmmədov əlavə edib.
