Neftçalanın Tataraməhlə kəndində sakinlər heyvanlarını otarmaq üçün sahələrin olmamasından əziyyət çəkirlər. Bu barədə iyunun 6-da Report xəbər paylaşıb.
Örüş sahəsinin zəbt edildiyini iddia edən sakinlər bildirirlər ki, heyvandarlıq onların əsas məşğuliyyəti və gəlir mənbəyidir. Hazırda onlar mal-qaranı tövlədə saxlamalı olur, bəziləri isə satmaq məcburiyyətində qalır.
“Torpaq islahatı zamanı əhaliyə örüş sahəsi kimi 200 hektar torpaq sahəsinin verilməsi üçün protokol tərtib olunub. Qalan torpaqlar da bələdiyyənin idi. Əhaliyə verilən 1 600 hektar torpaqdan başqa, qalan 400 hektar torpağın hamısı tanımadığımız şəxslərə satılıb”, - deyə kənd əhalisi şikayət edib.
Məsələ ilə bağlı Tataraməhlə kənd bələdiyyəsinin sədri Qabil Mehdiyev açıqlama verib. O bildirib ki, torpaq sahələri 25-30 və 40 illik icarəyə verilib.
“İcarə müddəti bitdikdən sonra torpaq sahələri yenidən hərraca çıxarılacaq. Kənd camaatı da hərracda iştirak etməklə torpaq sahələrini icarəyə götürüb örüş və ya əkin sahəsi kimi istifadə edə bilər”, - sədr deyib.
