Ordubadda fəhlə tikinti zamanı faciəvi şəkildə ölüb. Bu barədə İnsanoid Naxçıvan Muxtar Respublikası Prokurorluğuna istinadən bu gün, 5 oktyabr tarixində xəbər verir.
Rayonun Vənənd kəndində iaşə obyektinin tikintisi zamanı betontökən qurğunun başlığının dəyməsi nəticəsində İlham Hüseynov aldığı xəsarətlərdən ölüb.
Araşdırma zamanı tikinti işlərinin aparılmasına səlahiyyət verən sənəd olmadan torpaq sahəsi üzərində özbaşına tikinti və quraşdırma işlərinin aparıldığı, həmin tikintidə işləyən işçilərin fərdi texniki mühafizə vasitələri ilə təmin edilmədiyi, habelə tikinti işlərinin aparılmasının təhlükəsizliyi qaydalarının pozulmasının qarşısının alınması üçün heç bir tədbir görülmədiyi müəyyən edilib.
Fakta görə, Naxçıvan Muxtar Respublikası Prokurorluğunda Cinayət Məcəlləsinin torpaq üzərində mülkiyyət, istifadə və ya icarə hüququnu pozmaqla tikinti işləri aparma, tikinti, mədən işlərinin və sair işlərin aparılmasının təhlükəsizlik qaydalarının pozulması nəticəsində zərərçəkmiş şəxsin ölümünə səbəb olma və səhlənkarlıq maddələri ilə cinayət işi başlanıb.
