Özünü ölmüş kimi təqdim edən MTK direktoru Rafət Qəniyev barəsində 1 ay 22 gün müddətinə həbs qətimkan tədbiri seçilib. Bu barədə iyunun 7-də APA xəbər verib.
O, Cinayət Məcəlləsinin “dələduzluq - külli miqdarda ziyan vurmaqla törədildikdə” maddəsilə cinayət törətməkdə şübhəli bilinir.
Hadisə 2021-ci ilin noyabr ayında Sabirabadın Bulduq kəndi ərazisində baş verib. Araşdırma zamanı sözügedən şəxsin öz avtomobilinə heyvan sümükləri qoyaraq qəsdən yandırması və özünü ölmüş kimi qələmə verməsi aşkar olunub. Müəyyən edilib ki, o, bu addımı direktoru olduğu “Caspian İnşaat MB” MTK-ya məxsus mənzillərin satışında dələduzluq əməllərinə yol verdiyi üçün cinayət məsuliyyətindən yayınmaq məqsədilə atıb.
Hadisənin üstü Rafət Qəniyev mağazalardan birinə gələrək şəxsiyyət vəsiqəsi ilə televizor alarkən açılıb.
