Son iki ildə Bakıya qaranquşlar gəlmir. Bunun səbəblərini biologiya üzrə elmlər doktoru Tahir Kərimov mayın 12-də APA-ya danışıb.
Tahir Kərimov deyib ki, buna səbəb pandemiya zamanı aparılan dərmanlamalardır. “Məsələ ondadır ki, qaranquşlar, əsasən, ağcaqanadlarla qidalanan quşlardır, son illərdə isə paytaxtda, demək olar, ağcaqanadlar tamamilə yoxa çıxıb”, - deyə alim bildirib.
Bioloq qaranquşların Bakıya gəlməməsinin digər səbəbinin isə iqlim dəyişikliyi ilə əlaqədar ola biləcəyini deyib: “Hazırda iqlim dəyişikliyi ilə bağlı bir çox quş növlərinin yaşayış arealı şimala çəkilib. Güclü istiləşmə səbəbindən Azərbaycanda da bir neçə quş növü itirilmək üzrədir”.
Tahir Kərimov qeyd edib ki, pandemiya ilə bağlı aparılan dərmanlamaya görə qaranquşlarla yanaşı, şanapipiklər də Bakıya gəlmir.
