Bir neçə nəfərə qarşı dələduzluq etməkdə təqsirləndirilən iki şəxsə Bakı Ağır Cinayətlər Məhkəməsində hökm oxunub. Bu haqda iyunun 21-də Report xəbər verib.
Qumru Vəliyeva və Qalib Orcəlizadə 6 il müddətinə azadlıqdan məhrum ediliblər.
Q.Vəliyeva Q.Orcəlizadə ilə əlbir olaraq bir neçə şəxsə özünü Əmək və Əhalinin Sosial Müdafiəsi Nazirliyinin Pensiya siyasəti və fərdi uçota nəzarət şöbəsinin nümayəndəsi kimi təqdim edib. Qadın zərərçəkmişlərdən pul alaraq onlara pensiya və digər sosial müavinətlər düzəldə biləcəyini vəd edib. O, həmçinin əlillik pensiyasının məbləğinin artırılaraq aylıq 450 manat verilməsi, ünvanlı dövlət sosial yardım təyin etdirməsi, Birinci Qarabağ müharibəsinin iştirakçısı kimi torpaq sahəsinin məhkəmə qaydasında alınması və şəxsin psixi pozuntuları ilə bağlı aldığı əlilliyə görə pensiya müddətinin 5 il müddətinə artırılması imkanına malik olduğunu söyləyib.
Saxlanılan şəxslər vətəndaşlara qarşı ümumilikdə 30 min 970 manat ziyan vurublar.
