“Azərbaycanda kənd təsərrüfatının inkişafı hökumətimiz üçün prioritetlərdən biridir”. Bunu 6 may tarixində Prezident İlham Əliyev BMT-nin Ərzaq və Kənd Təsərrüfatı Təşkilatının (FAO) baş direktoru Qu Donqyunu videoformatda qəbul edərkən söyləyib.
“Birincisi, hazırda hər bir ölkə üçün vacib olan ərzaq təhlükəsizliyidir. İkinci məsələ odur ki, bu, bizim artmaqda olan qeyri-enerji ilə bağlı ixracımızın mühüm hissəsini təşkil edir. Bu ilin üç ayı ərzində Azərbaycanda qeyri-enerji ixracında artım 45% olub”, - deyə ölkə başçısı qeyd edib.
Dövlət rəhbəri, həmçinin kənd təsərrüfatının məşğulluq baxımından əhəmiyyətindən də danışıb: “Əhalimizin, demək olar ki, yarısı kənd yerlərində yaşayır. Bu insanlar üçün kənd təsərrüfatı əsas gəlir mənbəyidir”.
Prezident FAO-nun rəhbərinə ölkədə aparılan islahatlar və fermerlərə verilən subsidiyalardan məlumat verib: “Fermerlər hər hansı vergidən, o cümlədən torpaq vergisindən azaddırlar. Həmçinin biz fermerlərə güzəştli, aşağı faizlərlə kreditlər veririk”.
