İyunun 15-i saat 18:30-da Qəbələ Dəmir Yolu Vağzalının qarşısında yol qəzasında xəsarət alan xarici vətəndaşların son durumu açıqlanıb. Bu barədə İnsanoid Report-a istinadən bu gün, 17 iyun tarixində xəbər verir.
Yol-qəza hadisəsi nəticəsində 5 (hər biri qadın cinsli) xarici vətəndaş xəsarət alıb.
19 yaşlı şəxs yerindəcə dünyasını dəyişib. Digər 4 nəfər Qəbələ Rayon Mərkəzi Xəstəxanasına hospitalizasiya olunublar. Koma vəziyyətində olan 25 yaşlı şəxs Reanimasiya şöbəsinə yerləşdirilib. Vəziyyəti kritik ağır olaraq qiymətləndirilir.
56 yaşlı şəxsə sağ dirsək və sol diz nahiyələrinin sıyrıqları diaqnozu qoyulub, 26 və 22 yaşlı şəxslərin vəziyyətləri orta kafi olaraq qiymətləndirilir. Onların hər birinə Təcili tibbi yardım şöbəsində zəruri instrumental-diaqnostik müayinələr təyin olunub və tibbi xidmətlər göstərilib. Artıq ambulator müalicə üçün evə buraxılıblar.
Koma vəziyyətində olan 25 yaşlı şəxs 2 həkim, 1 tibb bacısından ibarət həkim briqadasının yer aldığı FHN-ə məxsus helikopterlə, 2 təcili tibbi yardım və 1 yerli həkim briqadasının nəzarəti altında iyunun 16-sı saat 11:00 radələrində Bakıya uğurla təxliyə olunub.
Proses təxliyə qaydalarına tam uyğun şəkildə həyata keçirilib. Təxliyə zamanı Respublika Təcili və Təxirəsalınmaz Tibbi Yardım Mərkəzinin tibbi briqadası pasiyentin hemodinamik göstəricilərini nəzarətdə saxlayıb.
