Mərkəzi Klinikadan məlumat verilib:
"Pasiyentimiz Qənirə Paşayevanın müalicəsi ümumi reanimasiya və intensiv terapiya şöbəsində davam etdirilir.
Vəziyyəti ağır olaraq qiymətləndirilir".
Qənirə Paşayevanın son durumu açıqlanıb 09:57
Milli Məclisin Mədəniyyət komitəsinin sədri, deputat Qənirə Paşayevanın vəziyyəti stabil ağır olaraq qalmaqdadır. Bu barədə Report 26 sentyabr tarixində xəbər verib.
Deputatın köməkçisi Elbəy Bədirov bildirib ki, Q.Paşayevanın səhhətində heç bir dəyişiklik yoxdur:
“Vəziyyəti əvvəlki kimidir. Həkimlər bütün lazımi tədbirləri görür. Hər kəsdən xahiş edirəm ki, rəsmi, dəqiqləşdirilməmiş informasiyaları yaymayın. İnşallah ki, tezliklə Qənirə xanımla bağlı sevindirici xəbəri yayarsınız”.
Sentyabrın 23-ü saat 03:01 radələrində TƏBİB-nin tabeliyindəki Abşeron Rayon Mərkəzi Xəstəxanasının Təcili və Təxirəsalınmaz Tibbi Yardım Stansiyasına Q.Paşayeva üçün çağırış daxil olub. Ona naməlum mənşəli hipotonik vəziyyət diaqnozu qoyulub. Müayinə zamanı göstəriciləri - arterial təzyiq 50/0 mm. c. süt, nəbz 1 dəqiqə 47 vurğu, SPO2 (saturasiya) 82% olub. İlkin müdaxilələrdən sonra göstəriciləri arterial təzyiq 110/60 mm. c.süt., nəbz 1 dəqiqədə 68 vurğu, SPO2 (saturasiya) 97% olub.
Həkimlər Q.Paşayevanın xəstəxana şəraitində müalicəsini məsləhət görüblər. Deputat ailə üzvlərinin istəyi ilə təcili tibbi yardım briqadası tərəfindən Mərkəzi Klinikaya təxliyə olunub. O, süni tənəffüs aparatına qoşulub.
