Bəstəkar Bəhram Nəsibovun qızı jurnalist Güldəstə Nəsib “Qarabağ” mahnısının tarixi barədə danışıb. Bu barədə İnsanoid Report-a istinadən bu gün, 12 iyul tarixində xəbər verir.
“Tarixi qələbədən sonra "Qarabağ" mahnısının Azərbaycan üçün, hər birimiz üçün necə böyük məna daşıdığını ermənilər görür və anlayırlar” - , deyə bəstəkarın qızı bildirib.
O qeyd edib ki, "Qarabağ" mahnısını Bəhram Nəsibov İncəsənət Universitetində oxuduğu illərdə yazıb, sözləri də, musiqisi də özünündür:
"Tarixi dəqiq deyə bilmərəm, amma ötən əsrin 60-cı illəri olub. Atam tələbə yataqxanasında qalırmış. Mahnı hazır olub, atam tarda ifa edərək özü də oxuyub. Onun səsinə bütün yataqxana yığışıb. Həmin zaman yataqxananın erməni komendantı da gəlib, qulaq asıb və deyib ki, bu mahnıya bir-iki Qarabağ ermənisinin də adını daxil elə. Atam etiraz edib. Deyib ki, erməninin Qarabağa nə dəxli var ki, mahnıya da əlavə edim? Komendant qəzəblənib və atamı yataqxanadan çıxardıb. Bundan sonra atam kirayə qalmağa məcbur olub".
Güldəstə Nəsib bildirib ki, mahnını 1972-ci ildə Müəllif Hüquqları Agentliyi (indiki Əqli Mülkiyyət Agentliyi-red) qeydiyyatdan keçirib:
"Öz əli ilə yazdığı ərizə indi də Agentlikdə qorunub saxlanır. Mahnının ilk ifaçısı xalq artisti Arif Babayev olub.
Mahnı Əqli Mülkiyyət Agentliyində qeydiyyatdan keçirildiyinə görə artıq Bəhram Nəsibovun yox, bütün Azərbaycan xalqının mülkiyyətidir. Əqli Mülkiyyət Agentliyi və Mədəniyyət Nazirliyi bütün bu məsələ ilə bağlı çox ciddi iş aparır. İnanıram ki, görülən tədbirlər tez zamanda bəhrəsini verəcək”.
