Azərbaycanın Qarabağ və Şərqi Zəngəzur iqtisadi rayonlarının inkişafına bu ilin sonunadək yatırılacaq özəl investisiyaların ümumi həcminin 300 milyon manat olacağı gözlənilir. Bunu "Caspian Event Organisers” şirkətinin baş direktoru “Rebuild Karabakh” Sərgisi və 27-ci Azərbaycan Beynəlxalq İnşaat Sərgisinin açılışında deyib.
Bu barədə 19 oktyabr tarixində Report xəbər verir.
"Xarici podratçıları və investorları cəlb etməklə Qarabağ üçün investisiyaların həcmi xeyli arta bilər. "Rebuild Karabakh" sərgisinin əsas məqsədi də budur”, - deyə baş direktor bildirib.
Onun sözlərinə görə, İnşaat Həftəsində dünyanın 17 ölkəsindən 300-dən çox şirkət iştirak edir. İştirakçılar arasında həm daimi, həm də yeni şirkətlər var. Almaniya, Birləşmiş Ərəb Əmirlikləri, İran, Rusiya və Türkiyə milli və regional pavilyonları təmsil edir.
Sərgi oktyabrın 21-ə qədər davam edəcək.
