2022-ci ilin yanvar-may aylarında Azərbaycanın qeyri-neft sektoru üzrə ən çox ixrac etdiyi məhsullar pambıq, pomidor, karbamid, qızıl və metanol olub. Bu barədə iyulun 1-də İqtisadi İslahatların Təhlili və Kommunikasiya Mərkəzinin dərc etdiyi “İxrac icmalı”nda məlumat verilib.
Sözügedən beş məhsulun ixracından ölkəmiz ümumilikdə 421 milyon dollardan çox gəlir əldə edib.
Belə ki, pambığın ixracı 123,7, pomidorun ixracı 91, karbamidin ixracı 84,1, qızılın ixracı 62,9, metanolun ixracı isə 60 milyon dollar təşkil edib.
Ümumilikdə cari ilin beş ayı ərzində Azərbaycanın ixracı 15,4 milyard dollar olub ki, onun da 1,2 milyard dolları qeyri-neft ixracının payına düşüb.
