Quba rayonunda narkotik vasitələr satan iki nəfər saxlanılıb. Bu haqda dekabrın 9-da Daxili İşlər Nazirliyi məlumat verib.
Belə ki, polis əməkdaşlarının keçirdikləri əməliyyat nəticəsində rayon sakini Hilal Cılğamlı tutulub. Baxış zamanı onun üzərindən və yaşadığı evindən kibrit qutularında marixuana, tiryək, heroin və “patı”, “şüşə” adlandırılan psixotrop maddə olan metamfetamin aşkar edilib.
Digər əməliyyatlar zamanı rayon sakini Sərvər Neymətov həbs edilib. Həmin şəxsin üzərinə və avtomobilinə baxış zamanı narkotik vasitə marixuana tapılaraq götürülüb.
Faktlarla bağlı cinayət işi başlanılıb.
Azərbaycanda cari ilin 10 ayı ərzində 6 tona yaxın narkotik dövriyyədən çıxarılıb. Müvafiq dövr ərzində narkotiklə bağlı 7 484 cinayət faktı aşkarlanıb. 5 021 nəfər cinayət məsuliyyətinə cəlb edilib.
