“Horadiz”, “Göytəpə” və “Şəmkir” sərhəd dəstələrinin əməkdaşları 20 kiloqramdan artıq narkotik, 6 919 psixotrop dərman preparatının Azərbaycana keçirilməsinin qarşısını alıb. Bu barədə dekabrın 9-da Dövlət Sərhəd Xidməti məlumat yayıb.
Belə ki, dekabrın 6-da “Horadiz” sərhəd dəstəsinin xidməti ərazisində Sumqayıt şəhər sakini saxlanılıb. Onun üzərindəki bağlamadan 2 kiloqramdan artıq narkotik və 400 ədəd “gabapentin-300” həbi aşkar olunaraq götürülüb.
Bundan əvvəl, sərhədçilər noyabrın 24-də, 25-də və 29-da da əməliyyatlar keçirib. “Göytəpə” sərhəd dəstəsinin xidməti ərazisində 4 nəfər Bakı sakini saxlanılıb. Saxlanılanlardan biri sərhədçilərə bıçaqla xəsarət yetirməyə çalışarkən tərksilah edilib. Onlardan ümumilikdə 6 kiloqramdan artıq narkotik və 2 000 “tramadol” həbi götürülüb.
Noyabrın 29-da “Horadiz” sərhəd dəstəsinin xidməti ərazisində naməlum şəxs tərəfindən İrandan Azərbaycan istiqamətində dövlət sərhədinin pozulması cəhdinin qarşısı alınıb. Sərhəd pozucusu əlindəki qaçaqmalı yerə ataraq geriyə qaçıb. Əraziyə baxış zamanı aşkar olunan bağlamadan 11 kiloqramdan artıq narkotik tapılıb.
Eyni gündə “Şəmkir” sərhəd dəstəsinin xidməti sahəsində Gürcüstandan Azərbaycana doğru rezin qayığın hərəkəti sərhəd naryadı tərəfindən müşahidə edilib. Sərhədçilərin “Dayan” əmrinə tabe olmayan qayıqdakı şübhəli şəxslər özlərini suya atıb və havanın qaranlıq olmasından istifadə edərək hadisə yerindən qaçıb. Qayığa baxış zamanı içərisində 4 519 müxtəlif çeşidli dərman preparatları aşkar edilib.
