Dünən, martın 11-də Azərbaycan və İran arasında Anlaşma Memorandumu imzalanıb. İmzalanan sənədin Azərbaycan üçün əhəmiyyətini millət vəkili Vüqar Bayramov 12 mart tarixində öz Facebook səhifəsində şərh edib.
Onun sözlərinə görə, memorandumun əsas məqsədi Azərbaycanın əsas hissəsi ilə İran ərazisindən keçməklə Naxçıvan MR arasında yeni dəmir, avtomobil yolu əlaqəsinin, eləcə də rabitə və enerji təminatı xətlərinin yaradılmasından ibarətdir. Layihənin maliyyələşdirilməsi ilə bağlı tərəflər ilkin razılığa gəlib. Belə ki, Şərqi Zəngəzur iqtisadi rayonunu İranla birləşdirən avtomobil körpüsünü Azərbaycan tərəfi, Naxçıvan MR-in Ordubad rayonu ilə birləşdirən avtomobil körpüsünün tikintisini isə İran tərəfi maliyyələşdirəcək. Dəmir yolunun tikintisinin maliyyələşdirilməsi məsələsi isə növbəti 6 ay ərzində razılaşdırılacaq.
Vüqar Bayramov qeyd edib ki, nəqliyyat xəttinin istifadəyə verilməsi Azərbaycanı regionun nəqliyyat qovşağına çevirəcək. Yeni layihə Naxçıvanın Azərbaycanın əsas ərazisi vasitəsilə Şərq-Qərb və Şimal-Cənub nəqliyyat dəhlizlərinə çıxışını təmin edəcək. O əlavə edib ki, yeni yaradılacaq kommunikasiya vasitəsilə Azərbaycan elektrik enerjisini Türkiyə və Avropaya ixrac etmək imkanı qazanacaq.
