Dünya ölkələrinin buğda ixracının 29%-i Rusiya və Ukraynanın payına düşür. Sözügedən iki ölkə arasında yaşanan münaqişə buğdanın qiymətinin sürətlə artmasına gətirib çıxarır. Bəs yaranmış bu vəziyyət ölkəmizin buğda bazarında necə əks olunacaq? Məsələni martın 14-də İqtisadi İslahatların Təhlili və Kommunikasiya Mərkəzinin departament rəhbəri Rəşad Hüseynov şərh edib.
Rəşad Hüseynov vurğulayıb ki, Azərbaycanda əhalinin çörəyə olan tələbatı böyük olduğundan buğda çox ciddi strateji məhsul hesab edilir. Statistikaya əsasən, ölkəmizdə un istehsalı 2020-ci ildə adambaşına 84-85 kiloqram olub. İnkişaf etmiş ölkələrdə isə bu rəqəm 55-65 kiloqram təşkil edir.
Onun sözlərinə əsasən, 2021-ci ildə ölkəmizdə buğda istehsalında hər hektara düşən məhsuldarlıq 31,7 sentner olub. Lakin bu göstərici bir sıra qabaqcıl ölkələrlə müqayisədə aşağıdır.
“Azərbaycanın taxılla bağlı ehtiyatları bir müddət daxili bazarda qiymətinin saxlanılması üçün istifadə oluna bilər. Lakin Azərbaycan üçün ən optimal variant alternativ bazarları axtarmaqdır”, - deyə departament rəhbəri bildirib.
Qeyd edək ki, Azərbaycan buğda tələbatının 60%-nı təmin edə bilir. 2022-ci ilin yanvar ayında ölkəmiz 32,4 milyon dollar dəyərində buğda idxal edib ki, bu da 2021-ci ilin yanvar ayı ilə müqayisədə 5 dəfədən çoxdur.
