Ölkədə torpaqların özəlləşdirilməsi zamanı qanunsuz əməllərə yol vermiş Əmlak Məsələləri Dövlət Xidmətinin və bələdiyyələrin 10 vəzifəli şəxsi məsuliyyətə cəlb edilib. Bu barədə iyunun 9-da Baş Prokurorluq məlumat verib.
Dövlət Xidmətinin Şirvan şəhər şöbəsinin rəisi Nazim Səfərov, Ucar ərazi şöbəsinin rəisi Amil Aslanov, Qazax rayonunun Daşsalahlı bələdiyyəsinin sədri Asif Yusifov, Şəki rayon Qoxmuq bələdiyyəsinin sədri Etibar Eyvazov və Kürdəmir Rayon İcra Hakimiyyəti başçısı Aparatının Sosial-İqtisadi İnkişafın təhlili və proqnozlaşdırılması şöbəsinin müdir müavini Ruslan Əliyevin daha öncə saxlanılan şəxslərlə birlikdə cinayətdə iştirak etmələri məlum olub.
Sözügedən şəxslər 2020-2022-ci illərdə digər təqsirləndirilən şəxslərlə əlbir olaraq bələdiyyə mülkiyyətində olan torpaq sahələrinin istifadəyə verilməsinə dair müsbət rəy müqabilində pul vəsaitlərini rüşvət qismində almaqda şübhəli bilinirlər.
Saxlanılan şəxslər “vəzifə səlahiyyətlərindən sui-istifadə etmə ağır nəticələrə səbəb olduqda”, “rüşvət alma külli miqdarda törədildikdə”, “rüşvət vermə” və digər maddələrlə ittiham olunublar. Onlar barəsində həbs, ev dustaqlığı və digər qətimkan tədbirləri seçilib.
Hazırda qanunsuz əməllərə yol vermiş digər vəzifəli şəxslərin müəyyən edilməsi istiqamətində araşdırma davam edir.
