Şəhid ailələri, müharibə əlilləri və imtiyazlı kateqoriyadan olan digər şəxslərə (Çernobıl əlilləri, gözdən əlilliyi olan şəxslər) daha 50 mənzil təqdim edilib. Bu barədə 20 oktyabr tarixində Report məlumat verib.
Qeyd olunub ki, Abşeron və Bakının Sabunçu, Binəqədi rayonlarındakı yeni yaşayış komplekslərində təqdim edilən mənzillər də daxil olmaqla şəhid ailələri və müharibə əlillərinə postmüharibə dövründə 4 min, ümumilikdə ötən dövrdə 13 minədək mənzil və fərdi ev verilib.
Şəhid ailələri və müharibə əlillərinə bu il üzrə 1 500 mənzil və fərdi ev verilməsi nəzərdə tutulub ki, artıq 1 000-ə qədəri təqdim edilib. Çernobıl əlilləri və gözdən əlilliyi olan şəxslərin mənzillə təminatı işləri də davam etdirilir. Çernobıl əlillərinə 2021-ci ildə 258, bu ilin ötən dövründə 64, gözdən əlilliyi olan şəxslərə ötən il 255, 2022-ci ildə isə 149 mənzil təqdim edilib.
