Biz, ideoloji səbəblərdən Azərbaycan xalqı adından Fransa Senatına və xalqına yönəlmiş petisiyanın imzalanması məqsədilə təbliğata başladığımız zaman bəzi izləyicilər şərhlərdə bəyan etdilər ki, biz “boş yerə” vəziyyəti gərginləşdiririk. Onlar yazırdılar ki, Azərbaycan və Fransa prezidentləri bu yaxınlarda Praqada keçirilən görüşdə artıq “hər şey haqqında razılaşıblar”. Buna təsdiq olaraq isə onlar 12 oktyabr tarixində Fransanın turizmin inkişafı agentliyi olan “Atout France” tərəfindən heç bir maneə olmadan “Inter Continental Baku” hotelində blogerlər üçün “Fransa sizi gözləyir” adı altında tədbirin keçirilməsini göstərirdilər. Bizi inandırmağa çalışırdılar ki, əgər Fransa, doğrudan da, Azərbaycana qarşı düşmən addımları atsa idi, ölkəmizin hakimiyyəti paytaxtın mərkəzində belə bir tədbirin keçirilməsinə icazə verməzdi. Həmçinin onlar bizə Azərbaycan hakimiyyətinin nümayəndələrinin fransızları tənqid etməkdən çəkindiklərini, bunun bizim ölkəmizin maraqlarına qarşı çıxmaq olduğunu göstərirdilər. Bu səbəbdən bəzi blogerlər fransız siyasətçilərinin düşmən fəaliyyətinə qarşı bir çox azərbaycanlının mövqeyini təqdim edən petisiyanı imzalamamaq üçün təkid edirdilər.
Petisiyanın Azərbaycan dilinə tərcüməsi
Petisiyanın Rus dilinə tərcüməsi
Petisiyanın Türk dilinə tərcüməsi
Nəticədə biz, demək olar ki, tək qaldıq (( Lakin bu, çox çəkmədi. Bizə köməyə prezident Emmanuel Makron şəxsən gəldi! Ayın 12-si, axşam «France 2» kanalında çıxış edərkən o bəyan etdi: “Azərbaycan böyük sayda ölümlərlə, dəhşətli səhnələrlə və ərazi işğalı ilə qorxunc müharibəni başlatdı. Sentyabr ayında Azərbaycan sərhəd boyu, öz ərazisinin bir tərəfindən o biri tərəfinə dəhliz yaratmaq üçün bir sıra hücum əməliyyatları etdi. Biz onu buna görə qınadıq...Biz erməniləri və Ermənistanı tək qoymayacağıq. Fransa Azərbaycandan qaz almır. Belə bir razılaşmamız yoxdur. Düzdür, bəzi Avropa ölkələrinin qaz razılaşmaları var. Lakin sizə deyim ki, Fransaya və Avropanın səslərinə qaldıqda, bizim dəyərlərimizi və prinsiplərimizi qaz və ya neft qiymətinə almaq mümkün deyil”.
Bu çıxışın nəticəsində Azərbaycan rəsmiləri, nəhayət ki, fransız dövlət məmurlarının və parlamentarilərinin düşmən fəaliyyəti ilə bağlı öz səssizliyini pozdular. 13 və 14 oktyabr tarixlərində bir sıra kəskin bəyanatlar səsləndirildi. Bunlardan bir neçəsini misal çəkirik:
- Prezident İlham Əliyev: “Fransa Prezidenti təhqiramiz, qəbulolunmaz, yalan və təxribat xarakterli bəyanatlarla çıxış etdi. Bu bəyanatlar mətbuatda var, hər kəs onları görə bilər. Bu bəyanatlarda o, Azərbaycanın dəhşətli müharibə törətdiyini bildirib, bununla da faktları manipulyasiya edərək, Fransa və dünya ictimaiyyətini çaşdırmağa səy göstərib. Azərbaycan beynəlxalq səviyyədə tanınan öz ərazisində müharibə aparırdı. Qarabağ bütün dünya tərəfindən Azərbaycanın tərkib hissəsi kimi tanınıb. Biz özünümüdafiə hüququndan istifadə edərək, ərazi bütövlüyümüzü güc hesabına bərpa etdik. Daha sonra bildirilib ki, Fransa Ermənistanı heç vaxt tərk etməyəcək. Bu, necə deyərlər, ikitərəfli münasibətlər məsələsidir. Həmçinin Rusiya Federasiyasının ünvanına: “Rusiya Azərbaycan oyununu oynadı” kimi qərəzli bəyanatlar səsləndirildiyini bildirən Azərbaycan Prezidenti deyib: “Böyük ölkənin Prezidentinə qarşı küçə leksikonundan istifadə etməyin nə dərəcədə siyasi nəzakətə uyğun olmasını qoy Fransa ictimaiyyəti müəyyən etsin. Biz isə öz tərəfimizdən belə bəyanatları qəti surətdə pisləyirik, rədd edirik və bundan sonra Fransa hökumətinin belə münasibəti çərçivəsində Azərbaycan-Ermənistan münasibətlərinin normallaşdırılması işində Fransanın hər hansı rol oynamasının heç bir mümkünlüyünü görmürük”.
- “Fransa Prezidenti Azərbaycan ərazilərinin 30 illik işğalı, yüz minlərlə azərbaycanlının fundamental hüquqlarının tapdalanması, Azərbaycanın ərazi bütövlüyü prinsipinin pozulması, Ermənistanın BMT Təhlükəsizlik Şurasının dörd qətnaməsinə əməl etməməsinə görə Ermənistanın əleyhinə bir söz belə deməyən dövlət başçısıdır”, - Azərbaycan Xarici İşlər Nazirliyinin mətbuat xidmətinin bəyanatında deyilir.
- “Ermənistanı həyasız dəstəyinə görə bilavasitə Fransa məsuliyyət daşıyır. Noyabrın 15-də Senat Azərbaycan əleyhinə qətnamə qəbul etməyə hazırlaşır. Belə bir qətnamə qəbul olunarsa, Azərbaycan bu ölkədəki səfirini geri çağırmalı və diplomatik münasibətlərə yenidən baxmalıdır”, -bunu Milli Məclisin Hüquq siyasəti və dövlət quruculuğu komitəsinin sədr müavini Qüdrət Həsənquliyev Milli Məclisin iclasında deyib.
- “Fransa həmişə ermənipərəst mövqeyi ilə seçilib və bu gün də mövqeyini tutmaqda davam edir, Qarabağdan sonrakı münaqişə zamanı Ermənistanın maraqlarını qorumağa çalışır”, - Milli Məclisin deputatı Sevinc Hüseynova bildirib.
- Azərbaycan və Fransa parlamentlərarası əlaqələr üzrə işçi qrupunun rəhbəri Soltan Məmmədov Fransanın xarici işlər naziri Ketrin Kolonnanı regionda vəziyyəti gərginləşdirməkdə ittiham edib. “Biz hər zaman o mövqedən çıxış etmişik ki, münasibətlərin zədələnməsinə, qarşılıqlı etimadın zəifləməsinə yol vermək doğru deyil. Lakin təəssüf ki, Fransa öz siyasətini, yanaşmasını dəyişmir. Daha çox Ermənistanın maraqlarını müdafiə edir”,- Məmmədov bəyan etdi.
Azərbaycanın rəsmi reaksiyasını gözləyənlər Makron sayəsində bunu eşitdi. Beləliklə, Azərbaycan xalqı adından Fransa Senatına və xalqına yönəlmiş petisiyaya dəstək məqsədilə niyə səs verilməməyinə dair bəhanələrin sayı əhəmiyyətli şəkildə azaldı.
Səs verin! Qoy Senat və sıravi fransızlar, nəhayət ki, sadəcə dövlət məmurlarının deyil, sıravi azərbaycanlıların da fikirlərini eşitsinlər! Hər bir səs önəmlidir! Əgər petisiyaya on minlərlə insan səs versə, bizim mövqeyimizi təkcə Fransanın kütləvi informasiya vasitələri deyil, Avropa İttifaqının digər ölkələri də görəcək. İlk dəfədir ki, Avropada erməni təbliğatının səsini kəsmək imkanı yaranıb! Təlimata əməl edin və Azərbaycanı qorumaq üçün öz səsinizi verin!
Səsvermədə necə iştirak etməyə dair təlimat
