DSX: Ruben Vardanyan “Laçın” sərhəd-buraxılış məntəqəsində saxlanılaraq Bakıya gətirilib
Sentyabrın 27-də “Laçın” dövlət sərhədindən buraxılış məntəqəsində Dövlət Sərhəd Xidmətinin hərbi qulluqçularının sayıqlığı nəticəsində ölkə ərazisinə qeyri-qanuni gələrək qondarma “Dağlıq Qarabağ Respublikasının Dövlət naziri” vəzifəsində çalışmış 1968-ci il təvəllüdlü Ruben Karlenoviç Vardanyan Azərbaycan Respublikasından Ermənistan istiqamətində hərəkət edərkən saxlanılıb.
Bu barədə 27 sentyabr tarixində Dövlət Sərhəd Xidməti məlumat verib.
O, Dövlət Sərhəd Xidmətinin Çevik Hərəkət Qüvvələri əməkdaşlarının müşayiəti ilə Bakı şəhərinə gətirilib.
Saxlanılan şəxs barəsində müvafiq qərar qəbul edilməsi üçün aidiyyəti dövlət orqanlarına təhvil verilib.
***
13:37
Separatçı Ruben Vardanyan saxlanılıb
İddia olunur ki, Ruben Vardanyan "Laçın" sərhəd-buraxılış məntəqəsində saxlanılıb. Bu barədə 27 sentyabr tarixində AZfront Telegram kanalı məlumat verib.
Məlumata əsasən, hadisə bu gün səhər saatlarında baş verib. Ermənistan separatçı anklavının keçmiş “hökumət başçısı” diqqəti cəlb etməmək üçün sınıq-salxaq avtomobillə Ermənistana getməyə çalışıb.
Qeyd olunub ki, sentyabrın 25-də o, qadın paltarında Ermənistan sərhədini keçmək üçün uğursuz cəhd edib. Sentyabrın 26-da isə Ermənistandan daxil olan məlumata görə, Vardanyanın yaxınları Xankəndidə baş vermiş partlayış nəticəsində xəsarət alanları və ölənləri daşıyan Ermənistan Səhiyyə Nazirliyinin helikopterlərindən birində onun sarğılı vəziyyətdə təxliyə olunmasının mümkünlüyü məsələsini müzakirə ediblər.
