"Şahdəniz" qaz-kondensat yatağının istismarı layihəsi SOCAR üçün kommersiya baxımından vədedici görünür. Bu barədə 11 dekabr tarixində şirkətin Tədbirlərin təşkili və ictimaiyyətlə əlaqələr idarəsinin rəis müavini İbrahim Əhmədova istinadən Trend məlumat verib.
Şirkət rəsmisinin sözlərinə görə, dünyada təbii qaza tələbat artacaq. "Təbii qaz enerji keçidi dövründə ekoloji cəhətdən kömürdən daha təmiz həll yoludur. Bizim əsas hədəf bazarımız olan Avropada qaza tələbin və qiymətlərin artması bir daha 2013-cü ildə "Şahdəniz 2" layihəsinin işlənməsi və "Cənub Qaz Dəhlizi" üzrə verilən investisiya qərarının doğruluğunu təsdiq etdi. Vaxt keçdikcə təbii qaz ixracından əldə olunan gəlirlər neft ixracının gəlirləri ilə müqayisədə daha əhəmiyyətli rola sahib olacaq", - deyə o bildirib.
