SOCAR Rumıniya iqtisadiyyatına 69 milyon dollar investisiya yatırıb. Bu haqda iyunun 23-də şirkətin vitse-prezidenti Kənan Nəcəfova istinadən Report xəbər verib.
“Şirkətin bu ölkədə 67 yanacaqdoldurma məntəqəsi və 3 yanacaq saxlama deposu mövcuddur”, - deyə K.Nəcəfov bildirib.
O, həmçinin əlavə edib ki, hazırda SOCAR-ın Rumıniyada 729 işçisi çalışır.
Aprelin 12-nə olan məlumata əsasən, Azərbaycan Dövlət Neft Şirkətinin ümumi 572 yanacaqdoldurma (YDM) məntəqəsi var. Onların 42-si Azərbaycandadır. Ən çox YDM İsveçrədədir. Orada şirkətin 200 YDM-i və 8 elektrik yükləmə məntəqəsi var.
Qeyd edək ki, Azərbaycan Rumıniyaya 125 milyon dollar investisiya yatırıb, Rumıniya şirkətləri isə ölkəmizə 30 milyon dollar investisiya qoyub.
