İsrafil Məmmədovun 1919-cu ildə Şəmkir rayonunun Qapanlı kəndində anadan olduğu və həmin ildə ailəsinin Gəncəyə köçdüyü qeyd edilir. Digər məlumatlara görə, onun 1919-cu ildə Gəncədə anadan olduğu yazılıb. O, Sovet İttifaqı Qəhrəmanı adına layiq görülən ilk azərbaycanlı olub.
O, Gəncədə Sənaye Texnikumunu bitirib. Daha sonra toxuculuq fabrikində işləyib.
İsrafil Məmmədov 1939-cu ildən sovet ordusunda xidmətə başlayıb. O, 1941-ci ildə Böyük Vətən müharibəsində Novqorod vilayətinin Pustınka kəndi uğrunda gedən döyüşlərdə iştirak edib. Məmmədovun başçılıq etdiyi dəstə Pustınka kəndi yaxınlığındakı mühüm xətti müdafiə etdi. İsrafil Məmmədov 20 nəfərlə birlikdə alman işğalçıları ilə qeyri-bərabər döyüşdə vuruşur və 10 saat ərzində dəstə nasist batalyonunun hücumlarını dəf edir. Məmmədov düşmənin 70 əsgərini və 3 zabitini məhv edir, ümumilikdə isə bu döyüşdə 300-ə yaxın faşist həlak olur. Məhz bu şücaətinə görə İsrafil Məmmədov Sovet İttifaqı Qəhrəmanı adına layiq görülüb. Həmçinin o, Lenin ordeni və Qızıl Ulduz medalı ilə təltif edilib.
İsrafil Məmmədov iştirak etdiyi sonuncu döyüşdə boğazından güllə yarası alıb. Lakin sağalsa da, vərəmə tutulub. Bir müddət Yaltada müalicə alsa da, 1 may 1946-cı ildə vəfat edib. İsrafil Məmmədov Gəncədə Xan bağında dəfn edilib və burada onun büstü qoyulub.
Gəncədə İsrafil Məmmədovun ev-muzeyi fəaliyyət göstərir, həmçinin yaşadığı evin üzərində xatirə lövhəsi var. Gəncədə bir küçə və 27 nömrəli məktəb-lisey, həmçinin Şəmkirin Qapanlı kəndində məktəb onun adını daşıyır.
