Türkiyə-Rusiya Birgə Monitorinq Mərkəzi fəaliyyətə başladıqdan erməni qüvvələrinin 203 dəfə atəşkəsi pozduğunu qeydə alıb. Bu barədə dekabrın 10-da Report “TRT Haber” telekanalına istinadən məlumat yayıb.
Televiziya əməkdaşının sözlərinə görə, mərkəzdə 60 türk hərbçisi xidmət edir. Onlardan 13-ü PUA operatorudur. Atəşkəs pozuntuları barədə həm Azərbaycan, həm Ermənistan tərəfinə məlumat göndərilir.
Jurnalist atəşkəs pozuntularının necə hesablandığını da açıqlayıb: “Türk hərbçiləri eyni müddətdə təkrarlanan pozuntuları atəşkəsin pozulması üzrə bir fakt kimi qeydə alırlar”.
Ağdamda açılan atəşkəsə nəzarət üzrə Monitorinq Mərkəzi cari ilin yanvarın 30-dan fəaliyyət göstərməyə başlayıb.
