Mingəçevir şəhəri Kür çayı axmazında yerləşən qum-çınqıl yatağında öz qulluq mövqeyindən istifadə edərək təbiətə zərər vuran Nəriman Zəkəriyəyevin məhkəməsi başlayır. Bu haqda iyulun 5-də Baş Prokurorluq xəbər paylaşıb.
N.Zəkəriyəyev dövlət mülkiyyətində olan 9,400 kvadratmetr torpaq sahəsini qazanc əldə etmək məqsədilə özbaşına istismar edərək dövlətə və təbiətə 202 min manat məbləğində ziyan vurub. O, öz qulluq mövqeyindən 2018-ci ilin may ayından 2022-ci ilin yanvar ayınadək istifadə edib.
Saxlanılan şəxs “torpaq üzərində mülkiyyət, istifadə və ya icarə hüququnu pozma”, “işlərin yerinə yetirilməsi zamanı ətraf mühitin mühafizəsi (qorunması) qaydalarını pozma” və “vəzifə səlahiyyətlərindən sui-istifadə” maddələrilə ittiham olunur. Cinayət işi baxılması üçün Şəki Ağır Cinayətlər Məhkəməsinə göndərilib.
