Xaçmazda müəllimə işləyən 37 yaşlı Nuranə Orucova şəhid anasına qarşı dələduzluq edib. Bu barədə iyunun 10-da Kriminalqafqaz məlumat yayıb.
O, Vətən Müharibəsində şəhid olan Əliheydər Hüseynlinin anasına zəng edib özünü Müdafiə Nazirliyinin vəzifəli şəxsi kimi təqdim edib. Qadın ona oğlunun sağ olduğunu deyib və sağ-salamat gələcəyini vəd edərək 4 000 manat pul alıb.
Həmçinin sözügedən şəxs məktəbə işə düzəldəcəyinə dair müxtəlif insanlara söz verib və onlardan pul tələb edib. Onun vətəndaşlara qarşı ümumilikdə 20 min manat dələduzluq etdiyi məlum olub.
N.Orucova istintaq müddətində zərərçəkmişlərə vurduğu ziyanın 12 min manatını ödəyib. Cinayət işi baxılması üçün Sumqayıt Ağır Cinayətlər Məhkəməsinə göndərilib.
Qeyd edək ki, Əliheydər Hüseynli Vətən Müharibəsində Füzuli, Xocavənd, Cəbrayıl və Qubadlının uğrunda gedən döyüşlərdə könüllü olaraq savaşıb. O, noyabrın 9-da Xocavənd rayonu ərazisində gedən döyüşlər zamanı həlak olub. Şəhid "Vətən uğrunda", "Döyüşdə fərqlənməyə görə", "Xocavəndin azad olunmasına görə" medalları ilə təltif edilib.
