Xarici ölkələrdə qanunsuz silahlı birləşmələrə qoşulan Elxan Novruzbəyova Bakı Ağır Cinayətlər Məhkəməsində hökm oxunub. Bu haqda iyunun 22-də APA xəbər yayıb.
O, cəzasını ciddi rejimli cəzaçəkmə müəssisəsində çəkməklə 6 ay müddətinə azadlıqdan məhrum edilib. Cəzanın əvvəli yanvarın 13-dən hesablanacaq.
Təqsirləndirilən şəxs cinayət əməlini Pakistanda törətdiyi üçün ona sözügedən dövlətin qanunvericiliyinə uyğun cəza təyin olunub. O, “Azərbaycandan kənarda qanunvericiliklə nəzərdə tutulmayan silahlı birləşmələrin fəaliyyətində iştirak etmə” maddəsilə ittiham olunub.
Məlumata görə, Azərbaycan vətəndaşı öncə İranın Tehran şəhərinə, oradan isə qanunsuz silahlı birləşmələrə daxil olmaq məqsədilə qeyri-leqal yolla digər ölkələrə keçib. E.Novruzbəyov Qasımov Vüsal Qəzənfəroviçin rəhbərlik etdiyi qanunsuz silahlı birləşmələrin tərkibinə daxil olub. O, xaricdə cinayətkar dəstələrə qoşulmaqla döyüş təlimlərində və silahlı münaqişələrdə iştirak edib.
