İranda yaşayan şəxslərlə öncədən sövdələşərək oradan əcnəbilərin ölkəyə kənar yollarla keçirilməsini təşkil edən iki Azərbaycan vətəndaşı saxlanılıb. Bu haqda iyunun 24-də Dövlət Təhlükəsizliyi Xidməti xəbər yayıb.
Məlumata görə, 31 yaşlı Rasif Ağayev və 52 yaşlı Ənvər İsayev İran sakinləri ilə əlbiq olaraq oradan pul müqabilində qeyri-leqal yolla xariciləri Azərbaycana keçirməkdə şübhəli bilinirlər.
Rasif Ağayev gecəgörmə cihazı və digər avadanlıqlarla Yardımlının Arvana kəndindən dövlət sərhədini pozaraq İrana keçib və orada olan əcnəbiləri qanunsuz yolla Azərbaycana keçirib. Daha sonra o, əcnəbiləri Ənvər İsayevin Yardımlıdakı evinə, oradan isə Bakıda yerləşən öz evinə gətirib.
Nəticədə hər iki şəxs və xarici ölkə vətəndaşları saxlanılıblar.
R.Ağayev və Ə.İsayev “qabaqcadan əlbir olan bir qrup şəxs tərəfindən Azərbaycan Respublikasının dövlət sərhədini qanunsuz olaraq keçmə” maddəsilə ittiham olunublar.
Faktla bağlı araşdırma davam edir.
