Şirvan şəhərində körpənin ölümünə görə mama-ginekoloq barəsində cinayət işi başlanılıb. Bu barədə oktyabrın 24-də Baş Prokurorluqdan məlumat verilib.
Belə ki, Şirvan Şəhər Mərkəzi Xəstəxanasında şəhər sakini Aytac Miriyevanın 26 avqust 2022-ci il tarixdə yeni doğulmuş uşağı ölüb.
Aparılmış araşdırmalarla müəyyən edilib ki, qeyd olunan xəstəxanada mama-ginekoloq vəzifəsində işləyən Sevinc Alışova tərəfindən müayinələr əsasında diaqnoz düzgün təyin edilməyib. Şəkərli diabetlə bağlı tibbi göstəriş əsasında doğuşu cərrahi yolla başa çatdırmaması nəticəsində yeni doğulmuş uşaq ölüb.
Onun barəsində “səhlənkarlıq, ehtiyatsızlıqdan zərərçəkmiş şəxsin ölümünə səbəb olduqda” maddəsi ilə cinayət işi başlanıb.
Hazırda istintaq davam edir.
