Yevlaxda 3 min hektara yaxın ərazidə pilot aqroparkın yaradılmasına başlanılıb. Bu haqda iyunun 24-də Azərtac məlumat verib.
Burada ağıllı idarəetmə sisteminin tətbiqi, aqronom və biznes-konsaltinq xidmətlərinin təşkili planlaşdırılır. Aqroparkın emal zonasında meyvə qurusu, cem, ət və süd məhsulları, makaron, konservləşdirilmiş məhsullar, meyvə tingləri, toxum, heyvan yemləri, gübrə və digər məhsulların istehsalı nəzərdə tutulub.
Bu günə qədər 1727 hektar sahə üzrə sahibkarlarla icarə müqavilələri imzalanıb.
Aqroparkın ilk rezidenti “İSFA” MMC tərəfindən artıq bağ və ting sahələrinin salınmasına başlanılıb. Müəssisədə meyvə bağları salınacaq, tingçilik inkişaf etdiriləcək. “İSFA” MMC-də 8 nəfər üçün daimi, 30 nəfər üçün isə mövsümi iş yerləri yaradılıb.
Ümumilikdə “Yevlax Pilot Aqropark”ında 500 işçi daimi, 1000-dən çox işçi isə mövsümi işlərə cəlb ediləcək.
Qeyd edək ki, 103 milyon manatlıq dəyəri olan layihənin açılışı 2021-ci ilin dekabrında olub.
Hazırda Azərbaycanda 32 rayon üzrə 239,3 min hektar ərazidə 51 aqropark yaradılır. Onlardan artıq 44-ü fəaliyyətə başlayıb. Həmin aqroparklarda artıq 4 491 nəfər daimi, 6 303 nəfər isə mövsümi işlə təmin edilib.
