Yevlaxın Hacıselli kəndində əməliyyat zamanı polisə xəsarət yetirilib. Bu barədə iyulun 4-də Baş Prokurorluq məlumat verib.
Kənd sakini Röyal İsmayılov və onun atası Müşviq İsmayılov narkotik tərkibli bitkiləri kultivasiya yolu ilə yetişdiriblər. Bu səbəbdən də əraziyə polis əməkdaşları gəlib. Lakin əvvəllər məhkum olunmuş Röyal polisə kəsici alətlə xəsarət yetirib. Daha sonra o, hadisə yerindən qaçıb, onun atası isə saxlanılıb. Ərazidən 50 ədəd çətənə kolu aşkarlanaraq götürülüb.
Faktla bağlı “qəsdən sağlamlığa ağır zərər vurma” və “hakimiyyət nümayəndəsinə qarşı müqavimət göstərmə və ya zor tətbiq etmə”, “qanunsuz olaraq tərkibində narkotik maddələr olan bitkiləri kultivasiya etmə” maddələrilə cinayət işi açılıb.
Daha sonra qaçmış şəxs də saxlanılaraq istintaqa cəlb edilib. Saxlanılan hər iki şəxs barəsində həbs qətimkan tədbiri seçilib.
Faktla bağlı araşdırma davam edir.
