Yol polisi Bakıda keçiriləcək “TEKNOFEST Azərbaycan” Aerokosmik və Aviasiya Festifalı ilə bağlı sürücülərə və paytaxt sakinlərinə müraciət edib. Bu barədə mayın 24-də Bakı şəhər Dövlət Yol Polis İdarəsindən APA-ya bildirilib.
Festival mayın 26-dan 29-dək “Bakı Kristal Zalı” və onun ətrafında, Dənizkənarı Bulvarda baş tutacaq.
“Festivalın keçiriləcəyi əraziyə 08:30-18:00 aralığında və əks istiqamətdə 09:00-21:00 arası avtobus xidməti təşkil edilib. Tədbiri canlı izləmək üçün tamaşaçılar ödənişsiz olaraq 28 May metrostansiyası yaxınlığından Bayraq Meydanı ərazisinə və geriyə “Baku Bus” MMC-nin avtobusları ilə hərəkət edəcəklər”, - deyə vurğulanıb.
Qeyd edilib ki, bununla əlaqədar həmin istiqamətə avtomobillərin hərəkətinə fasilələrlə məhdudiyyət qoyula və istiqamətin dəyişdirilməsi nəzərdə tutula bilər: “Tədbir zamanı şəxsi avtomobillərlə mümkün qədər az, ictimai nəqliyyat vasitələrindən istifadəyə üstünlük verilməsi tövsiyə edilir”.
