Yubiley və xatirə pul nişanları fiziki şəxslərə “Yubiley və xatirə pul nişanlarının onlayn satış sistemi” ilə yanaşı, birbaşa Azərbaycan Mərkəzi Bankının kassaları vasitəsilə də satılacaq. Bu barədə 14 oktyabr tarixində Mərkəzi Bank məlumat verib.
4 min manatdan çox ödəniş yalnız bank hesabı vasitəsilə həyata keçirilə bilər. Eyni zamanda banklar istisna olmaqla, digər hüquqi şəxslərə yubiley və xatirə pul nişanlarının satışı AMB ilə bağlanmış müqavilə əsasında həyata keçiriləcək.
Həmçinin əcnəbi və vətəndaşlığı olmayan şəxslər də “Yubiley və xatirə pul nişanlarının onlayn satışı sistemi”ndə istifadəçi FİN-i, Asan imza və ya elektron imza vasitəsilə qeydiyyatdan keçərək yubiley və xatirə pul nişanlarının real vaxt rejimində satın alınması hüququ əldə edib.
Vətəndaşlar pul nişanlarını real vaxt rejimində satın ala və yaxud həftənin II və IV günləri saat 10:00-dan 13:00-a qədər AMB-nin Bakı şəhəri, Səbail rayonu, Bülbül prospekti, 27 ünvanında yerləşən inzibati binasındakı və ərazi idarələrindəki (Yevlax, Gəncə, Biləsuvar, Quba, Naxçıvan) kassalardan əldə edə bilərlər.
