Uzaq 2050-ci ildə yaşayan Hanna adlı qadın xroniki yuxusuzluğun fəsadlarının canlı təcəssümüdür. Alimlər gün ərzində cəmi altı saat yatan və durmadan telefonuna baxan bir qadının modelini hazırlayıblar.
İnsanoid.com xəbər verir ki, Hannanın cəmi 45 yaşı olsa da, vəziyyəti heç də ürəkaçan deyil: qızarmış gözlər, sallanmış dəri, ağrıyan bel, incəlib tökülən saç və yaşlı qadınlardakı kimi zəif yaddaş.
Gecələrini telefonda keçirən Hanna özünü daim yorğun hiss etməyə başladığı üçün idmanı atıb və bel nahiyəsindən bir qədər kökəlib. Yuxusuzluq aclıq və toxluq hormonlarında (qrelin və leptin) problemlər yaratdığı üçün Hanna sürətli karbohidratlara meyil edib və nəticədə qarnı nəzərəçarpacaq dərəcədə böyüyüb. Üstəlik, o, daimi qrip və digər soyuqdəymələrdən əziyyət çəkir. Məlumdur ki, immunitet məhz yuxu zamanı bərpa olunur, lakin yazıq Hannanın buna heç vaxtı yoxdur. Bundan əlavə, onun beli də bərk ağrıyır.
Hanna sadəcə uydurma bir personaj deyil: onun obrazı yuxusuzluğun insanın xarici görünüşünə və sağlamlığına təsiri barədə akademik jurnallarda dərc olunmuş 19 elmi məqaləyə əsaslanır.
