Ötən gün Bakının Xətai rayonunda, General Şıxlınski küçəsində yerləşən "Ab Hava" restoranında bir nəfərin ölümü, bir neçə nəfərin yaralanması ilə nəticələnən kütləvi dava baş verib.
İlkin məlumata görə, biznes münasibətləri zəminində yaranmış münaqişənin həlli və tərəflərin barışdırılması məqsədilə təşkil olunan görüş zamanı restoranın kabinetində mübahisə yaranıb. Daha sonra münaqişə foyedə bıçaqlı davaya çevrilib.
Hadisə nəticəsində kriminal aləmdə "Ceyhun Sabunçu" kimi tanınan Ceyhun adlı şəxs qətlə yetirilib.
Daxili İşlər Nazirliyinin məlumatına əsasən, insidentdə iştirak edən 9 nəfər saxlanılıb. Qətli törətməkdə şübhəli bilinən Milli Məclisin İnsan hüquqları komitəsinin sədr müavini və Azərbaycan Milli İstiqlal Partiyasının sədri, deputat Arzuxan Əlizadənin oğlu Əhməd Əlizadə ("Yeraz Əhməd") hadisədən sonra könüllü olaraq polisə təslim olub.
Qeyd edək ki, deputat A.Əlizadənin digər oğlu Orxan Əlizadə isə Xətai Rayon Məhkəməsinin hakimidir.
Faktla bağlı əməliyyat-axtarış tədbirləri və istintaq araşdırmaları davam etdirilir.
Mənbə: oxu.az
