Bu il fevral ayı bir çox konsertlər, teatrlarda tamaşalar, baletlər və digər performanslarla doludur. İnsanoid ilin ən qısa ayında baş tutacaq tədbirlərin keçiriləcək ünvanları, biletlərin qiymətləri barədə araşdırma aparıb.
2 fevral tarixində Dövlət Akademik Filarmoniyasında Gənclər Gününə həsr olunmuş "Yeni gənclik" musiqi günləri çərçivəsində konsert keçiriləcək. Konsertdə Üzeyir Hacıbəyli adına Azərbaycan Dövlət Simfonik Orkestri çıxış edəcək. Orkestrin ifasında bəstəkar Qara Qarayevin "Don Kixot" simfonik qravürləri də səslənəcək. Biletlərin qiyməti sıra və yerdən asılı olaraq 4 - 15 manat arasında dəyişir.
Fevralın 3-də Flame Towers-də kinoteatrın IMAX zalında “Anka” filminin təqdimat mərasimi baş tutacaq. Biletlərin qiyməti 15 - 55 manat arasında dəyişir. Tədbir saat 20:00-da başlayacaq. Filmin qala gecəsində Türkiyəli aktyor Ozan Akbaba da iştirak edəcək.
Bakı Konqres Mərkəzində fevralın 6-sı türkiyəli müğənni və bəstəkar Cem Adrianın konserti gözlənilir. Artıq biletlərin 50%-dən çox hissəsi satılıb. 20:00-da başlayacaq konsertdə iştirak etmək üçün qiyməti 25 - 270 manat civarında olan biletləri əldə etmək lazımdır.
Fevralın 12-si saat 15:00-da Nizami Kino Mərkəzində II Qarabağ Müharibəsində cəbhə xəttindəki fədakar jurnalistikasına görə ilin müxbiri adlandırılan Fulya Öztürk sevənləri ilə görüşəcək. O, televiziya xadimi Mehmet Akif Ersoyla “Effektiv Ünsiyyət Texnikaları və Jurnalistika” mövzulu seminar keçirəcək. Biletlərin qiyməti 40 manatdan başlayır.
19 və 20 fevral tarixlərində Rəşid Behbudov adına Dövlət Mahnı Teatrında uşaqlar üçün “Kung-Fu Panda” interaktiv musiqili tamaşası səhnəyə qoyulacaq. 12:00-da başlayan tədbir 16:30-a qədər davam edəcək. Biletləri 10 - 25 manata əldə etmək mümkündür.
Bu ay Heydər Əliyev Sarayında üç tədbirin keçirilməsi nəzərdə tutulub.
Planet Parni iz Baku yeni "Şiraslan vəzifəyə gəlir" adlı kinokomediyasını təqdim edir. Fevralın 19-da burada filmin təqdimatı baş tutacaq. Prodüserlər Tahir və Cabir İmanovlardır. Qeyd edilib ki, bu film kinoteatrlarda olmayacaq. Biletlərin qiyməti 10 - 35 manat təşkil edir.
Fevralın 22-də isə həmin məkanda müğənni Cəlal Abbasovun konserti keçiriləcək. Tədbir 20:00-da başlayacaq. Biletlərin qiyməti 10 - 60 manat aralığındadır.
Sözügedən sarayda fevralın 20-si Mixail Bulqakov tərəfindən yazılmış roman əsasında “Master və Marqarita” adlı tamaşa baş tutacaq. Tədbir 20:00-da başlayacaq və 21:30-da bitəcək. Biletlərin qiyməti 35-140 manat arasındadır.
Ayın axırı, fevralın 28-də isə Rəşid Behbudov adına Dövlət Mahnı Teatrında İllüzionistlər Paradı keçiriləcək. Tədbirin müddəti: 11:00 - 18:00. Biletlərin qiyməti 15 - 55 manatdır.
Adıçəkilən tədbirlərdə iştirak etmək üçün biletləri iticket.az saytından əldə etmək olar.
