İnsanoid yayın birinci ayında keçirilməsi gözlənilən bir sıra tədbirlər haqda araşdırma aparıb:
İyunun 1-də xalq artisti Brilliant Dadaşova “Ürəklə sizinlə” adlı solo konserti ilə Heydər Əliyev Sarayının səhnəsinə çıxacaq. Tədbir saat 20:00-da başlayacaq. Biletlərin qiyməti 40 - 150 manatdır.
Konsertdən çox tamaşalara üstünlük verənlər eyni tarixdə Dövlət Akademik Opera və Balet Teatrında "Min bir gecə" baletini izləyə bilərlər. Biletlərin dəyəri 13 - 16 manat arasında dəyişir.
İyunun 5-də Rus Dram Teatrında uşaqlar üçün “Transformers” şousu təşkil ediləcək. Şənliyin sonunda tamaşaçılar pulsuz olaraq foyedə sevimli personajları ilə şəkil çəkdirə biləcəklər. Biletlərin qiyməti sıra və yerdən asılı olaraq 4 - 20 manat aralığındadır.
"O olmasın, bu olsun" musiqili komediya iyunun 7-də Dövlət Akademik Musiqili Teatrının səhnəsinə qoyulacaq. 19:00-da başlayacaq tədbirə qatılmaq üçün qiyməti 6 - 10 manat civarında olan biletləri almaq olar.
İdmanla maraqlananlar iyunun 10-da UEFA Millətlər Liqası çərçivəsində keçiriləcək Azərbaycan – Slovakiya futbol oyununa gedə bilərlər. Matç “Dalğa Arena”da saat 20:00-da başlayacaq. Biletlərin qiyməti 1-ci kateqoriya üçün 5 manat, 2-ci kateqoriya üçün 2 manat, VİP üçün isə 10 manatdır.
Azərbaycan Qran-prisi 10 - 12 iyunda gerçəkləşəcək. Biletlərin qiyməti birgünlük ayaqüstü zonada 90 - 160, üçgünlük tribunada 280 - 970, uşaqlar üçün (16 yaşadək) isə 190 - 690 manatdır. Bildirilib ki, 2020-ci ildə COVID-19 səbəbilə təxirə salınmış yarış üçün alınan biletlər bu il keçərli olacaq.
11 iyun tarixində Türk estrada müğənnisi İlyas Yalçıntaş Elektra Events Hall-da pərəstişkarlarına musiqi dolu saatlar yaşadacaq. Həmçinin konsertdə yerli ifaçılar: Ayaz Babayev, Noton və Mehdi Sadiq çıxış edəcəklər. Biletləri 45 - 200 manata əldə etmək olar.
Sea Breeze Resort-da iyunun 18-də xalq artisti Emin Ağalarovun solo konserti keçiriləcək. Tədbir saat 19:00-dan 23:00-dək davam edəcək. Biletlərin qiyməti 50 - 2500 manat arasındadır.
İyunun 19-da Opera Studiyasında azyaşlılar üçün türk dilində “Keloğlan Masalları” adlı müzikl baş tutacaq. Biletlərin dəyəri 6 - 49 manatdır. 3 yaşınadək uşaqlara valideyn müşaiyəti ilə (valideyn üçün bilet zəruridir), əlavə yer tutmamaq şərti ilə giriş pulsuzdur.
Kamança ustası Mark Eliyahu iyunun 19-da "About Love" turnesi çərçivəsində Heydər Əliyev Sarayında çıxış edəcək. Saat 20:00-da başlayacaq tədbir üçün nəzərdə tutulan biletlər 40 - 220 manata satılır.
Qeyd edək ki, tamaşaçılarda COVID-19 pasportunun və ya immun sertifikatının olması zəruridir. Adıçəkilən tədbirlərdə iştirak etmək üçün biletləri iticket.az saytından əldə etmək olar.
