Zaqatala sakini Nizami Ramazanov 100-dən çox sahibsiz it üçün sığınacaq yaradıb. Hazırda isə sığınacağı böyütmək üçün yer problemi yaşayır. Bununla bağlı aprelin 26-da Xəzər Xəbər reportaj hazırlayıb.
Nizami bacısı ilə birgə 10 ildir ki, sahibsiz heyvanları öz hesabına müalicə edir. Buna səbəb bölgədə heyvanlar üçün sağlamlıq mərkəzlərinin olmamasıdır. Heyvanların sayı artdığından onlar aylıq 350 manata icarəyə yer götürüblər. Sığınacaq bir ildir, fəaliyyət göstərir. Bacı-qardaşa, həmçinin heyvansevərlər yardım edir.
Hazırkı sığınacaq yaşayış evlərinə yaxın olduğundan başqa əraziyə köçürülməlidir. Nizami qeyd edib ki, qonşular narazıdır, yer sahibi isə ərazini boşaltmaq üçün onlara 15 gün vaxt verib.
Onun sözlərinə görə, dəstək göstərilərsə, 2-3 ilə bölgədə sahibsiz itlərlə bağlı problem aradan qaldırıla bilər.
