2023-ci ilin iyulunda Sabunçu rayonunda yeni doğulmuş körpəsini zibil qutusuna atan qadına hökm oxunub. Bu barədə 12 yanvar tarixində “Qafqazinfo” xəbər verib.
1992-ci il təvəllüdlü Səbinə Qasımova “təhlükədə qoyma” maddəsi ilə təqsirləndirilib.
Sabunçu Rayon Məhkəməsində keçirilən prosesdə S.Qasımova uşağı qeyri-rəsmi nikahda olduğu şəxsdən dünyaya gətirdiyini, sənədi olmadığı üçün onu uşaq evinə verə bilmədiyini deyib: “4 il olar həyat yoldaşımdan boşanmışam. Qeyri-rəsmi ər-arvad münasibətində olduğum Xəyal adlı şəxsdən hamilə qalmışdım. Xəyal uşağı dünyaya gətirməyimə razı olmadı. Maddi imkanım olmadığı üçün vaxtında tibbi müdaxilə ilə hamiləliyi sonlandıra bilmədim. Qadın məsləhətxanasında həkim hamiləliyin müddətinə görə sonlandırılmanın mümkünsüz olduğunu dedi. 15 iyulda Sabunçu xəstəxanasının doğum şöbəsində qız uşağı dünyaya gətirdim”, - deyə körpənin anası bildirib.
Onun sözlərinə görə, imkanının zəif olduğu və ailə üzvləri tərəfindən həmin uşaq qəbul edilməyəcəyi üçün öncə uşaq evinə müraciət etmişdir. Lakin şəxsiyyət vəsiqəsi olmadığı üçün Səbinə Qasımova uşaq evindən imtina cavabı alıb.
“17 iyul 2023-cü il saat 14 radələrində Sabunçudakı həmin əraziyə gedərək bir qədər gəzişdim. Sonra uşağı, hazırladığım uşaq yeməyini və bezlərini məişət tullantılarının atılması üçün nəzərdə tutulmuş dəmir materialdan olan qutunun içərisinə qoyaraq bir qədər kənarda dayanıb uşağın götürülməsini gözlədim. Bir müddət sonra əvvəllər tanımadığım bir nəfərin oradan keçərkən uşağı görüb götürdüyünü müşahidə etdim. Həmin şəxs ətrafa nəzər yetirəndə məni gördü. Dərhal oradan uzaqlaşaraq yaşadığım evə getdim”, - Səbinə Qasımova deyib.
Sabunçu Rayon Məhkəməsinin hökmü ilə 32 yaşlı qadına 1 il islah işləri cəzası verilib.
Qeyd edək ki, hadisədən bir neçə saat sonra S.Qasımova müəyyən edilərək saxlanılmış, barəsində cinayət işi açılmış və 2 gün sonra isə məhkəmənin qərarı ilə polisin nəzarəti altına verilməklə sərbəst buraxılmışdı. Uşaq isə körpələr evinə yerləşdirilib.
