ABŞ-nin "Vintage Modern" şirkəti 1967-ci ilin əfsanəvi "Ford Mustang"ına bənzəyən, lakin müasir texnologiyalarla təchiz edilmiş yeni avtomobil modelini təqdim edib.
İnsanoid.com xəbər verir ki, "Fastback" adlanan model ilk baxışdan təxminən 60 il əvvəl istehsal edilmiş klassik avtomobili xatırladır. Əslində isə onun əsasında müasir "Ford Mustang GT" dayanır. Avtomobilin kuzovunun böyük hissəsi karbon lifindən hazırlanıb. Beşlitrlik V8 mühərriki xüsusi kompressorla təchiz edilib və 840 at gücü hasil edir.
Avtomobildə səkkiz təhlükəsizlik yastığı, müasir əyləc sistemi və elektron təhlükəsizlik texnologiyaları mövcuddur. Bir avtomobilin hazırlanmasına təxminən 900 saat əl əməyi sərf olunur.
Modelin qiymətinin təxminən 295 min dollar (501 500 manat) olduğu bildirilir. Bununla belə, istehsalçı yekun satış qiymətini hələ rəsmən açıqlamayıb.